Dat dit ek is

Fotograaf: Hanna Jacobs

As deel van ons huwelikseremonie op die 6de Desember, het ons die volgende liefdesverklarings aan mekaar voorgelees:

Matilda:

My George

Dat dit ek is
wat op 'n dag verdwaal het -
so het ek gedink-
en voor 'n deur beland het
wat net so effens oopgestaan het.
Dat ek met die oopstoot daarvan
myself bevind het in die kamers van jou siel.

Daar waar kosbaarhede oor baie jare
versamel is, bewaar is, waardeer is.

Dat dit ek is
wat kon blaai deur jou woorde;
kon warmte vind onder die klank van jou stem;
kon drink van jou wysheid.

Dat dit ek is wat kon tuiskom in jou liefde.

En vandag,
waar ons hier staan
met ons voete op die grond
van hierdie nuwe, ou-ou plek
wil ek dit alles vir jou wees:
veiligheid,
inspirasie,
warmte,
wysheid,
liefde.

As jou lewensmaat en anam cara wil ek nou saam met jou uitloop-
ons siele wyd-oop na die lewe en die wêreld;
wil ek saam met jou tot seën wees vir hierdie aarde.

My George,
ek het jou lief.
Dit sal altyd so wees.
En die wonder sal bly:
Dat dit ek is.


George:

My M, 

Soms, vroegoggend,

klink die treurige veraf roep

van die Swart Koekoek*

daar van die rivier se kant af op.

Hoor jy op ‘n dag die wyfie raas

kan jy verstaan

waarom hy

aanhoudend sê

dat hy so sad is.

Wanneer ek by jou is

voel ek nie

om soos die Swart Koekoek te roep nie.

My liefde vir jou

is ‘n Swartkop Wielewaal*-liefde.

Met note

wat soos helder druppels

in ‘n skoon poel val

wil ek verkondig

dat doodgewone werfdae

besondere geleenthede

en ronde stiltes

in sagte goudgeel vere toegedraai is.

Daar waar ek op my tak sit

en my note laat rol

sal ek nie omgee

as iemand nader staan

om die plek van die klank te sien nie.

Ek sal vrypostig sing

asof dit die natuurlikste ding

in die wêreld is.

En dit is.

Want in die nes waar ek bly

is jy.

* Roep van: - Swart Koekoek
                    - Swartkop Wielewaal