Kreatiwiteits-retreat

Sê nou jy is baie meer talentvol as wat jy tot nou toe gedink het? Sê nou die lewe wag om wonderlike dinge vir jou te wys? Sê nou iets wag om tot stand te kom, geskep te word, maar dit kan net deur jou gebeur? Sê nou net jy dink te klein in terme van bronne, geleenthede en wat alles moontlik is? Sê nou…

Is jy die trotse eienaar van ‘n polsslag? Dan is jy kreatief. En dit het met baie meer te doen as verf op doek, klei op wiel of houtskaafsels om jou voete.

Te veel mense sukkel met die woord kreatiwiteit. Jy kan byna verseker weet dat hulle by die hoor daarvan beelde oproep van skilders in verfbesmeerde jasse voor groot esels met ‘n beret skeef op die kop. Of nog erger, iemand wat verward met een oor deur die lewe gaan. Hulle besluit en sê dis nie vir hulle nie. Buitendien, die naaste wat hulle ooit aan teken sal kan kom is onderaan dokumente en kontrakte. Eenvoudig gestel – hulle is nie kreatief nie.

Ons sien dit anders.

KREATIWITEIT BETEKEN OM ‘N UNIEKE OOP KANAAL TE WEES VIR DIE VRYVLOEI VAN EINDELOSE MOONTLIKHEDE

Kyk net hoe oop is dit! Wat medium, geleentheid en mens aanbetref.

Op 'n Kreatiwiteits-retreat ontdek jy in die loop van 'n naweek op 'n speelse en sorgelose manier wat jou binnekind (jou siel, jou essensie) nodig het om lewendig te voel. Met basiese bewuswordingstegnieke leer jy hoe om die unieke kanaal te wees vir dit wat God vir jou droom. ('n Leidraad hier: dit wat jou laat vergeet van tyd en plek wanneer jy daarmee besig is; dit wat jy as kind geniet het om te doen; of daardie iets wat jy dink net te goed sal wees om waar te wees as jy dit heeldag kan doen... Begin solank droom!)

Deur dan die eenvoudige tegnieke deel van jou alledaagse lewe te maak, word alle fasette van jou lewe aangeraak. Jy het 'n belewenis van 'n groter betrokkenheid in jou eie lewe, 'n dieper konneksie met Iets of Iemand goed en groot wat aktief en sigbaar meewerk in jou lewe. Hierdie nuwe perspektief lei tot 'n gevoel van menswaardigheid, meer energie, groter kreatiwiteit en produktiwiteit. Jy voel lewendig.

Geen kuns ondervinding of agtergrond is nodig nie. Geen groot kuns gaan geskep word nie. Dit is 'n naweek van sorgelose ontdekking in 'n kleingroep konteks in 'n pragtige en stimulerende omgewing. 

Kreatiwiteits-retreats word begelei deur George en Matilda Angus en die  venue is of by The Restory op Barrowfield of net buite Witrivier by die merkwaardige huis van Ena Swart vir wie kuns en kreatiwiteit baie naby aan die hart lê.

Datums: Gaan na: Retreat Calender

Venue: Vind meer uit by Accommodation and Whereabouts
Koste: Gaan na Rates and Contact details

Lees meer oor George en Matilda by Meet us

Kontak ons  gerus om die volledige program vir die retreat aan te vra.