Intussen
Hierdie week, mense, het ons net glad nie by 'n gespreksopname uitgekom nie. Van vroeg tot laat, elke dag, het ons getrek.
Elke nou en dan vra ons vir mekaar: hoe is dit dat ons so baie goed het?
- Moet ons nie al die boeke maar uitgooi nie?
En al daardie stemme met wie ons in gesprek is stilmaak? En hoeveel retrestgangers het nie al voor die rakke gestaan en net die regte boek vir hul tyd en situasie gekry nie. Nee, ons kan nie.
- Die pottebakkersateljee liewer toemaak? Dit gaan buitendien 'n paar maande vat voordat dit weer in produksie is op Tafelkop.
Dis egter waar ek, Matilda, my uitleef en waar hoeveel mense hulself tydens werkswinkels kreatief uitdruk. Dis ook 'n baie belangrike geestelike hulpmiddel. Ons kan nie.
- Van die masjiene van my, George, se werkswinkel ontslae raak?
Ons het inderdaad 'n hele paar groot ingenieursmasjiene verkoop, omdat daardie fase van George se lewe verby is en dit ook met oorbruggingskapitaal vir die tydperk wat ons nou ingaan, gaan help. Maar die werkswinkel spaar ons ook baie geld, omdat dit die hartkamer is van waaruit al die herstelwerk en instandhouding by Die Restory gedoen word.
Nee, dit moet bly.
So het ons deur die lys gegaan en gesif, gedink, gesels en gekies.
Dis aan die vrug van daardie onderskeidingsproses wat ons nou heelweek trek. Die goed wat ons retreatsentrum Die Restory laat wees.
Ons is dankbaar vir só baie hulp:
- Familie wat gehelp het met pak en die inrig van die woonstel op Tafelkop
- 'n 3 ton vragmotor met diesel wat tot ons beskikking gestel is waarsonder ons nie die groot goed kon skuif nie
- 'n stewige waentjie wat vir ons geleen word en waarmee ons berge verskuif
- 3 werkers saam met wie ons oorlog toe sal gaan
- 'n plaasbestuurder wat vir ons die lang gras om die woonstel op Tafelkop laat sny
- Geldelike skenkings en rentevrye lenings om met hierdie gelaagde proses te help. Dis 'n ruimhartigheid wat ons telkens na aan trane het
- Vriende wat kosmaak en aflewer om die trekspan gevoed te hou
- Boodskappe en oproepe van bemoediging
Die lys is lank. So baie dankie.
So, ons is byna daar. Die plan is om van eerskomende Maandag permanent op Tafelkop te wees en van daar die enkele los punte op Barrowfield op te bind.
Die Restory is steeds Die Restory, nou net bietjie onder konstruksie met aanpassings.
Dankie dat ons nie alleen reis nie.
Al ons liefde.
George & Matilda
Gister my laaste afskeid geneem, soveel positiewe groei daar beleef, my in trane gehad om afskeid te neem. Ek persoonlik kan nie eers begin weer hoe julle moet voel nie, op 'n positiewe nota, 'n nuwe begin en journey vir julle, altyd hier om te help, al is dit met uitpak..... Liefde, Marinetha
ReplyDelete