Watchitometer

Foto deur George Angus

Ons kat Patat, het ‘n handige stert.

Dit is gekalibreer in tien netjies gespasieerde strepies wat “patats” genoem word. ‘n Patat is die eenheid waarin katirritasie gemeet word.

So ‘n gekalibreerde stert staan bekend as ‘n “Watchitometer”.

Jy begin by die punt en lees dit na sy lyf toe.

Lê hy by ons op die bed en jy vat aan sy een agterpootjie, dan knak sy stert mooi op die tweede strepie. Die 2 patats sê “Watch it!”

Jy vat aan elk van die toontjies aan daardie selfde poot. Die Watchitometer gaan op na 5 patats toe.

Jy los die pootjie en druk-druk sy dy tussen duim en wysvinger en sê: “Jy word lekker vet, nè.” Sy hele lang stert krul en lewe daar van sy boud af. “Ek het gesê watch it!” interpreteer jy die 10 patats.

Sou jy die lesings ignoreer en met jou lawwigheid aangaan, doen jy dit op eie risiko. Jy is gewaarsku. Dan gaan hy jou nie eers sy strepie-stert laat lees nie. Hy gaan net sy ore plattrek, jou hand met albei voorpote gryp en jou byt. ‘n Meter is net so handig soos die oog wat hom lees.

Vir The Restory resepteboek werk ons nou aan resepte waar die bestanddele in patats gemeet word. “Neem 6 patats meel, voeg 2 patats olie by…” Ons reken dit sal ‘n skade wees om so ‘n mooi katstert nie beter te benut nie.

Vraag is net: kan mens ‘n Watchitometer se battery uithaal sodat hy minder in die meel kriewel?

Aan die ander kant, selfs al sou jy kon, dink ek nie so ‘n lewelose katstert-tert gaan na enigiets proe nie. Dis net anders as daar op die ander punt van jou lang gemmer meetstok ‘n kop met ‘n bekkie sit wat jou hap.

George